நாகூர், காரைக்கால் ஸ்பெஷல் வாடா

சாதத்தில் உள்ள தண்ணீரை நன்கு வடித்து விட்டு அதில் ரவை மற்றும் சோடா உப்பு சேர்த்து நன்கு பிசைந்து கொள்ளவும். நன்கு கெட்டியாக இருக்க வேண்டும். மிகவும் குழைந்த சாதமாக இருந்தால், நான் கொடுத்த அளவை விட கூட ரவை எடுக்கலாம். கெட்டியாக இருக்க வேண்டும் அதான் முக்கியம். அதை 7 மணி நேரம் புளிக்க விடவும்.

அதன் பிறகு சின்ன மற்றும் பெரிய வெங்காயத்தை படத்தில் உள்ளது போன்று அரிந்து வைத்துக் கொள்ளவும். பச்சை மிளகாயையும் பொடியாக அரிந்து கொள்ளவும். பச்சரிசியை ரவை பதத்திற்கு பொடித்து வைத்துக் கொள்ளவும்.

இந்த பிசைந்து வைத்திருக்கும் வாடா மாவை இரண்டாக பிரித்து, அதில் ஒன்றில் இந்த அரிந்து வைத்திருக்கும் பாதியையும் அதற்கு தேவையான உப்பையும், பாதி பொடித்த அரிசியையும் சேர்த்து நன்கு பிசைந்து வைத்து கொள்ளவும்.

மற்றொரு பாகத்திற்கு , மீதி அரிந்து வைத்திருக்கும் வெங்காயம் மற்றும் பச்சைமிளகாயை எண்ணெயில் போட்டு , அத்துடன் சிறிது மஞ்சள்த்தூளும், விருபினால் இறால் சிறிதை இரண்டிரண்டாக கட் செய்து அதில் போட்டு வதக்க வேண்டும். அதிலேயே தேங்காய்துருவலையும் சேர்த்து வாசம் வர வதக்கி விட்டு இறக்கி ஆற விடவும்.

வதங்கியது ஓரளவு சூடு ஆறியதும், மீதி வாடா மாவில் சேர்த்து, அதற்கு தேவையான அளவு உப்பும், பொடித்த அரிசியையும் சேர்த்து நன்கு பிசைந்து கொள்ள வேண்டும். இரண்டு மாவு கலவையும் கெட்டியமாக இருக்க வேண்டும். அப்படி தளர்வாக இருப்பின் அதில் இன்னும் கொஞ்சம் அரிசியை பொடித்து போடலாம்.

ஒரு வானலியில் பொறிப்பதற்கு தேவையான எண்ணெய் ஊற்றி சூடு படுத்தவும். ஒரு தட்டில் ப்ளாஸ்டிக் பேப்பர் கழுவி வைத்து அதில் சிறிது தண்ணீர் தெளித்து விட்டு, கொஞ்சம் ப்ளைன் மாவிலிருந்து வைத்து லேசாக தட்டி நடுவில் ஓட்டை போட்டுக் கொண்டு அதை மெதுவாக எடுத்து எண்ணெயில் போடவும்.

இதே மஞ்சள் வாடா மாவையும் எடுத்து வடை போன்று எண்ணெயில் போடவும். இறாலை வெறும் வாடா மாவில் ஆங்காங்கே இறாலை பதித்தும் எண்ணெயில் போட்டு பொறிக்கலாம். சைவ பிரியர்கள் வெறும் வெள்ளை கலவை போன்று செய்தே வாடாவாக சுட்டு எடுக்கலாம்.

எண்ணெயில் போட்டதும், தன்னால் மேலே எழுந்து வரும் வரை திருப்பாமல் விடவும். எழும்பி லேசாக சிவந்ததும், திருப்பி போட்டு சிவக்க விடவும். இரு பக்கமும் நன்கு சிவந்ததும். எடுத்து விடவும்.

இதேப் போன்று எல்லாவற்றையும் பொறுமையாக சுட்டு எடுத்தால் சூப்பரான, மொறு மொறுவென்ற வாடா தயார். மூன்று விதமான வாட செய்முறை இதில் இருக்கின்றது. இதில் நீங்கள் விரும்பியப்படி செய்து சாப்பிடலாம்.