நாஞ்சில் சாளை மிளகும் புளியும் கறி வித் தேங்காய் ஆணம்

சாளை கறி செய்ய: வாணலியில் சாளை மீன், ஊற வைத்து கரைத்த புளி தண்ணீர், உப்பு சேர்த்து 15 நிமிடம் வைக்கவும்.

பின்னர் அடுப்பு பற்றி, வாணலியை வைத்து மிளகாய் தூள், மஞ்சள் தூள், மல்லி தூள், பெருஞ்சீரக தூள், மிளகு தூள் அத்தனையும் சேர்த்து கலந்து, மிதமான தீயில் மூடி வேக வைக்கவும்.(திக்காக விரும்புபவர்கள் மட்டும் மல்லித்தூள் சேர்க்கவும்)

மீன் ஓரளவு வெந்ததும், மற்றொரு வாணலியில் நல்லெண்ணெய், கடுகு, கறிவேப்பிலை சேர்த்து தாளித்து, நறுக்கிய சின்ன வெங்காயம் சேர்த்து வதக்கி அடுப்பை அணைத்து விடவும். பின்னர் இதை மீன் கலவையில் கொட்டி, லேசாக கிளறி, சிம்மில் வைத்து மேலும் 5 நிமிடங்கள் மூடி வேக விடவும். சுவையான சாளை மீன் மொளவும் புளியும் கறி தயார். இதை சாதம், அரிசிமாவு ரொட்டி இவற்றுடன் சேர்த்து சாப்பிடுவார்கள்.

தேங்காய் ஆணம் செய்ய: மிக்ஸியில் தேங்காய், மிளகாய் தூள், மஞ்சள் தூள், பெருஞ்சீரகம், சின்ன வெங்காயம், சிறிது தண்ணீர் எல்லாவற்றையும் சேர்த்து சற்று கொரகொரப்பாக அரைக்கவும்.

வாணலியில் எண்ணெய் ஊற்றி, கடுகு, கறிவேப்பிலை சேர்த்து தாளித்து, அரைத்த கலவை, தண்ணீர், உப்பு சேர்த்து, ஓரங்களில் பதைக்க தொடங்கியதும் அடுப்பை அணைத்து விடவும். கொதிக்க விட கூடாது. அருமையான தேங்காய் ஆணம் தயார். இது ரசம் மாதிரி ஒரு துணை கறி ஆகும்.

மிளகும் புளியும் கறி காரம், புளிப்பு எல்லாம் தூக்கலாக கொண்டிருக்கும். அதை கிரேவி மாதிரி சாதத்தில் நிறைய ஊற்ற முடியாது. எனவே கட்டாயம் தேங்காய் ஆணம் சேர்த்து சாப்பிடுவது நாஞ்சில் மக்கள் வழக்கம்.